पर्यटकांसाठी मुंबईत धावणार इलेक्ट्रिक व्हिक्टाेरिया बग्गी

 

 

 

 

मुख्यमंत्री उद्धव ठाकरे यांच्या हस्ते मुंबईत पर्यटकांसाठीच्या इलेक्ट्रिक व्हिक्टाेरिया बग्गींचे अनावरण वर्षा निवासस्थानी करण्यात आले. यावेळी पर्यटन मंत्री आदित्य ठाकरे, परिवहन मंत्री अ‍ॅड. अनिल परब आदी उपस्थित हाेते.

 

मुख्यमंत्र्यांनी यावेळी या बग्गीची सविस्तर माहिती घेत या उपक्रमास शुभेच्छा दिल्या. बग्गीचालक युसूफ मुसा चाेरडवाला, इरफान देसाई, अजीज खान, इस्माईल चाेरडवाला यांना मान्यवरांच्या हस्ते चाव्या प्रदान करून बग्गी मार्गस्थ करण्यात आल्या. मुंबई व्यतिरिक्त पुणे, काेल्हापूर अशा पर्यटन स्थळांवरही अशी सुविधा सुरू हाेणे गरजेचे असल्याचे आदित्य ठाकरे यांनी सांगितले.

मुंबईतील हेरिटेज स्थळे दाखवणे आणि प्रत्येक स्थळाजवळ संबंधित स्थळांची माहिती पर्यटकांना मिळण्याची सुविधा या गाडीत असेल.

 

उबाे राईड्ज या कंपनीकडून ही बग्गी चालवण्यात येणार आहे. एकूण 40 व्हिक्टाेरिया बग्गी टप्प्या-टप्प्याने मुंबईत चालवण्यात येतील. पहिल्या टप्प्यात दक्षिण मुंबईत 12 बग्गी सुरू करण्यात येणार आहेत. यांपैकी 6 बग्गी ‘गेट वे ऑफ इंडिया’ येथील ताज पॅलेस हाॅटेल समाेरून सुटतील, तर उरलेल्या 6 नरीमन पाॅईंटहून सुटणार आहेत.

या बग्गींमधून सायंकाळी 4 पासून मध्यरात्री 2 पर्यंत दक्षिण मुंबईची सफर करता येईल. ही बग्गी बॅटरीवर चालणारी आहे. एकदा बॅटरी चार्ज झाल्यावर 70 ते 80 कि.मी.पर्यंत प्रवास शक्य हाेणार आहे.